Euskararen Maratoia badator !

2016ko Maiatzak 12, Osteguna

Lau urte igaro dira, euskara bihotzetik Okendo plazara atera eta azkenekoz 'Bero-bero' abestia entzun genuenetik. Hemendik bost hilabetetara berriro ere, 40 ordu irauten dituen euskararen jai handia izango da gurean eta Ttakun kultur elkartea eta Lasarte-Oriako Udaleko Euskara batzordea lan eta lan dabiltza hitzordua prestatzen.

Aurten gainera, urte berezia izango da, Euskararen Maratoiak 30. urte betetzen baititu. Baina Lasarte-Oriako euskalgintzaren barruan, ez da urteurren berezia duen ekintza bakarra. Horregatik, aurreratu digutenez, elkarte eta eragile hauek guztiek tartetxo bat izango dute Euskararen 9. Maratoian.

Aurkezpena

Berezitasun hau eta beste hamaika azaltzeko maiatzaren 11n, 19:00etan, Euskararen 9. Maratoiaren aurkezpena egingo da Lasarte-Oriako Gaztelekuan.

Maratoia zuzenduko duen zortzikotea, leloa eta irudia ezagutzera emateaz gain, agerraldian ezustekoak ere izango direla aurreratu dute antolatzaileek.

Elkarlana

Lasarte-Oriako elkarte eta eragile guztiak gonbidatu dituzte antolatzaileek, “elkarlanerako lehen lokarri” gisa.

Izan ere, Udaleko eta Ttakuneko lagunek azaldu modura, Euskarazko 40 orduko jai etengabea honen lehen urratsak besterik ez baitira eman. Elkarte, eragile eta herritarren elkarlanari esker osatzen da egitaraua eta lan asko dago egiteke. 

Eta ezin ahaztu arlo ezberdinetan egiten den bolondres lana edo proba berezietan parte hartzen duten herritarrak. Lasarteoriatarrak ez baitira ikusle edo partehartzaile soilik, Euskararen Maratoiaren parte ere dira. Horregatik, hauek ere gonbidatuak daude ekitaldi honetara.

Motorrak berotu eta ahotsak prestatu, badator eta Euskararen 9. Maratoia!